Notas de prensa: IV Ciclo de Concertos Soncello

Temos a alegría de compartir que o primeiro concerto do IV Ciclo de Concertos Soncello, celebrado no Circo de Artesáns dentro do ciclo Luminarias do Clasicismo de Fogueiras 2026, foi destacado por La Voz de Galicia.

Daniel Iglesias (cello) e Laura Díaz (piano) durante o concerto o pasado 30 de Maio

Este concerto inaugural, protagonizado por un recital de violoncelo e piano, ofreceu unha velada de música de cámara íntima e coidadosamente construída, que foi recibida con gran entusiasmo polo público asistente. O éxito desta primeira cita supón un magnífico comezo para unha nova edición do ciclo, que continúa apostando pola excelencia artística e pola difusión do repertorio para violoncelo.

Desde Soncello queremos expresar o noso agradecemento aos intérpretes Daniel Iglesias e Laura Díaz, colaboradores, institucións e asistentes que fixeron posible este concerto. Así mesmo, agradecemos a La Voz de Galicia o seu interese pola nosa actividade e a súa contribución á visibilidade da música clásica e dos proxectos culturais que se desenvolven en Galicia.

O IV Ciclo de Concertos Soncello continuará nos vindeiros meses con novas propostas artísticas e encontros musicais que seguirán achegando ao público o amplo universo do violoncelo.

Agradecemos tamén o apoio de Cultura da Deputación da Coruña, cuxo compromiso coa cultura fai posible a realización de iniciativas coma esta.