Crónica do IV Ciclo de Concertos Soncello 2026
- Soncello
- 14 hours ago
- 3 min read
Durante as últimas semanas, A Coruña e Oleiros convertéronse nun punto de encontro para o violoncelo grazas ao IV Ciclo de Concertos Soncello.
A través de seis concertos celebrados en distintos espazos da Coruña e Oleiros, o ciclo reuniu intérpretes de diferentes xeracións e perfís, ofrecendo ao público unha ampla mostra das posibilidades expresivas do instrumento.
O ciclo comezou no Círculo de Artesáns co recital de Daniel Iglesias e Laura Díaz. O programa percorreu diferentes linguaxes e épocas, desde o clasicismo de Haydn ata a escritura contemporánea de György Ligeti e as cores e ritmos da música arxentina de Alberto Ginastera. Un concerto que puxo de manifesto a versatilidade do violoncelo e o alto nivel artístico das novas xeracións de intérpretes.
Poucos días despois, a Colexiata de Santa María do Campo acolleu unha das propostas máis singulares do ciclo. O cuarteto de violoncelos formado por Rubén Canedo, Emilio Ubach, Iván Fernández e Carolina Landriscini ofreceu unha homenaxe a David Popper, figura fundamental na historia do instrumento. A interpretación dunha selección dos seus estudos op. 73, xunto con obras de Goltermann e Fitzenhagen, permitiu descubrir unha faceta musical que vai moito máis alá do seu coñecido valor pedagóxico. O concerto concluíu coa mítica versión de Nothing Else Matters, convertida nun auténtico símbolo do cuarteto de violoncelos grazas a Apocalyptica nos anos noventa. O cuarteto regresou unha semana máis tarde coa súa homenaxe a David Popper na Igrexa de Santiago da Coruña.
A presenza de novos intérpretes foi outro dos eixes desta edición. No CMUS Profesional da Coruña, Alexandre Ferreira, xunto co pianista Damián Hernández, presentou un programa que combinou a profundidade de Bach co lirismo e a riqueza expresiva de Dvořák, Elgar e Davidoff. O recital permitiu apreciar o talento dun músico moi novo que xa conta cunha destacada traxectoria e numerosos recoñecementos.
Ao día seguinte, o Círculo de Artesáns acolleu o recital de Virginia Rodríguez-Tubío e Damián Hernández. Obras de Bach, Dvořák, Davidoff e Shostakovich conformaron un programa de grande esixencia artística, que alternou momentos de virtuosismo, intensidade dramática e fonda expresividade. O concerto confirmou a sólida proxección dunha intérprete que continúa acadando importantes éxitos dentro e fóra de Galicia.
A clausura do ciclo estivo dedicada á música antiga. Saúl Nogareda, Ángela Neto e Erea Blanco presentaron o programa Da liña do baixo continuo á voz solista: o violoncelo nas primeiras sonatas a tre, primeiro no CMUS Profesional da Coruña e posteriormente na Residencia de Maiores de Iñás, en Oleiros.
A través de obras de Vivaldi, Telemann, Platti e Boismortier, o concerto propuxo un percorrido pola evolución do violoncelo entre finais do século XVII e a primeira metade do XVIII, amosando como o instrumento foi gañando protagonismo ata converterse nunha voz plenamente independente dentro da música de cámara.
Desde Soncello queremos agradecer a todos os intérpretes, colaboradores, institucións e asistentes a súa participación nesta cuarta edición. Os concertos reafirman o valor deste ciclo como un espazo de encontro arredor do violoncelo, da música de cámara e da difusión do rico repertorio musical do noso instrumento.
Xa podedes acceder á galería completa de fotografías dos concertos!
Comments