O Diario de Compostela faise eco da nosa XI Xuntanza

A XI Xuntanza de Soncello segue a soar máis aló. O Diario de Compostela fíxose eco deste encontro tan especial que reuniu a máis de medio cento de violonchelistas para celebrar a música, a aprendizaxe e a convivencia arredor do violonchelo. Unha nova que nos alegra especialmente e que pon en valor o traballo colectivo de toda a comunidade Soncello.

Artigo do Diario de Compostela

Un encontro para compartir música, formación e comunidade

Final do concerto da Orquestra Soncello da XI Xuntanza no CMUS de Santiao de Compostela

O evento tivo lugar no Conservatorio Profesional de Música de Santiago, onde se deron cita intérpretes procedentes de diferentes puntos de Galicia e de Ponferrada.

A xornada combinou diversas actividades: unha exposición de lutería con instrumentos e arcos elaborados por artesáns de Valencia, Asturias e Galicia; clases maxistrais impartidas polo violonchelista compostelán Iago Domínguez (residente en Basilea); e, como peche, un concerto colectivo.

O concerto estivo a cargo da Orquestra Soncello —integrada por 50 violonchelistas de distintos niveis— baixo a dirección do violonchelista vigués Iván Nogueira (residente en Rotterdam), quen tamén realizou os arranxos musicais.

Un impulso para a comunidade de violonchelistas galegos

No seu artigo, o Diario de Compostela salienta que esta XI edición confirma a Xuntanza como unha das citas centrais de Soncello. Desde a súa fundación en 2011, esta asociación traballa para dinamizar a práctica do violonchelo en Galicia, promovendo oportunidades formativas e poñendo en valor o instrumento.

Para nós, esta cobertura supón un recoñecemento ao esforzo colectivo do alumnado, do profesorado e da organización: un paso máis para dar visibilidade ao violonchelo en Galicia e reforzar a nosa comunidade.